Режимдік шектеулерді Каспий теңізінің қазақстандық секторының аумағында тоқтатқысы келеді. Бұл туралы “КазТАГ” ақпарат агенттігі хабарлайды.
“2020 жылдың 30 қыркүйегіне дейін Каспий теңізінің қазақстандық секторында Сағындық мүйісінен Ракушечный мүйісіне дейінгі теңіздегі Экономикалық қызмет аудандарын: теңіз порттарын, су жинау арналарын, газ терминалын, теңіз дәліздерін, фарватерлерді және тағы сол сияқтыларды қоспағанда, режимдік шектеулердің әрекетін тоқтату”, – делінген Қазақстан Республикасы Ұлттық қауіпсіздік комитеті бұйрығының жобасында.
Көрсетілген кезең ішінде теңізге бір теңіз миліне дейін, екі мың метрге жуық қашықтыққа еркін шығуға, жеке және заңды тұлғалар демалу, туризм және спорт үшін пайдаланатын қазақстандық шағын көлемді өздігінен жүзетін және өздігінен жүзбейтін, суүсті және суасты кемелерінің белгіленген акваториясында жүзуге немесе пайдалануға жол беруді жоспарлап отыр.
Сурет: kaztag.kz
