Қазақстанның Индонезиядағы төтенше және өкілетті елшісі Данияр Сарекенов Индонезия Республикасы ауыл шаруашылығы министрлігінің азық-түлік қауіпсіздігі жөніндегі агенттігінің бас директоры Агунг Хендриадимен кездесті.
Кездесу барысында азық-түлік қауіпсіздігі жөніндегі Ислам ұйымы бас ассамблеясының «Азық-түлік қауіпсіздігі арқылы ислам ынтымақтастығын жақсарту» тақырыбындағы екінші сессиясының қорытындысы қаралды.
Сонымен қатар, қазақстандық дипломат сұхбаттасушыға жоғарыда аталған ұйымның азық-түлік қауіпсіздігі саласындағы Ислам ынтымақтастығы ұйымына қатысушы елдердің мүмкіндіктерін шоғырландыруға бағытталған басты мақсаттары мен функциялары туралы айтты.
Өз кезегінде индонезиялық агенттіктің бас директоры ұйымның қалыптасуы бойынша жүргізген Қазақстанның жұмысын жоғары бағалады және Индонезияда азық-түлік қауіпсіздігі мәселелеріне ерекше көңіл бөлінетінін айтты.
Сондай-ақ, Агунг Хендриади бүгінгі күні елдің басшылығы Индонезияның азық-түлік қауіпсіздігі жөніндегі Ислам ұйымына қосылу мәселесін шешумен айналысып жатқанын айтты.
Келіссөздер аясында тараптар ауыл шаруашылығы саласындағы екіжақты ынтымақтастық мәселелерін, соның ішінде екі мемлекеттің салалық министрліктері арасындағы өзара түсіністік туралы меморандумға қол қою мәселелерін талқылады.
Сурет: mfa.gov.kz
