Біздің республикамыздың ғалымы Болат Сұлтанқұлов жедел мерзімде адам ағзасындағы коронавирустық инфекцияны анықтауға мүмкіндік беретін жедел тест ойлап тапты. Бұл туралы “Қазақпарат” ақпарат агенттігі хабарлады.
Сұлтанқұлов тест жасау идеясы коронавирус індетінің пайда болуына байланысты туындағанын айтты. Оның айтуынша, жедел тест әзірлеуге жарты жыл уақыт кеткен. Оны жасау барысында салалық ғалымдардың кеңестеріне сүйенгенін атап өтті.
Тест дайындау жұмыстары Ұлттық биотехнология орталығында жүргізілді. Сұлтанқұлов оны әзірдеудің негізгі компоненті бактерияларда өндірілетін наноденелер екенін айтты.
Қазақстандық ғалымның экспресс-тесті зертханалық сынақтардан сәтті өтті және енді клиникалық зерттеулер жүргізілетін болады. Сұлтанқұлов оның өнертабысы барлық жас ерекшелік өкілдері үшін қауіпсіз екенін айтты.
“Тест вирустың концентрациясы ең жоғары болған кезде белгілер басталғаннан кейінгі алғашқы жеті күнде тиімді болады деп болжаймыз. Біз тесттің белгісі білінбейтін науқастарға әсері қалай болатынын білмейміз. Мұны одан арғы зерттеу көрсетеді”, – деп атап өтті Сұлтанқұлов.