Жерді жалға алушылар туралы ақпарат ашық болуы тиіс. Бұл туралы “Қазақстан фермерлер одағы” Республикалық қоғамдық бірлестігінің президенті Жигули Дайрабаев айтты, деп хабарлайды ҚазАқпарат тілшісі.
“Жерді жалға алған жер пайдаланушылардың тізімі ашық болуы керек. Заңды тұлғалар, құрылтайшылар, олардың кім , қай мемлекеттің азаматтары екендігі туралы ақпарат ашық болуы керек. Халық жерді пайдаланушыларды білуі тиіс”, – деді Жигули Дайрабаев Жер реформасы жөніндегі комиссияның бірінші отырысында сөйлеген сөзінде.
Сондай-ақ ол жер пайдаланушылардың азаматтығы мәселесіне тоқталды.
“Біз жерді шетелдіктерге сатуға тыйым салу мәселесін талқылағанда, кейбір қазақстандық жер пайдаланушылардың шетелдік азаматтығын қалай алғанын байқамадық. Өкінішке орай, мұндай фактілер бар. Жақын арада тиісті материалдарды комиссияның назарына ұсынамыз. Шетелдік азаматтар бұл жерлердің кепілдігімен банктерден миллиондаған несие алмайтынына және шетелге қашып кетпейтініне кім кепілдік береді”, – деп толықтырды Жигули Дайрабаев.
Спикер мұндай жағдайға жол бермеу үшін тиісті тетіктерді қарастыру қажет екенін баса атап өтті.
