Баспасөз мәслихаты барысында онлайн-режимде “Даму “кәсіпкерлікті дамыту қоры” компаниясының мемлекеттік органдармен өзара іс-қимыл жасау департаментінің басшысы Гүлсая Зейнелғабдина төтенше жағдай аяқталған соң елде ісін жаңа бастаған бизнесмендер төмендетілген пайыздық мөлшерлеме бойынша несие ала алатынын айтты. Бұл туралы “Қазақпарат”ақпарат агенттігі хабарлайды.
“Осылайша, “Еңбек” бағдарламасы бойынша кәсіпкерлер алты пайызға несие ала алады. Бұл ретте қарыз сомасы 6,5-тен 8 мың АЕК-ке дейін болуы мүмкін. Қарыз мерзімі – 5 жыл. “Бизнестің жол картасы-2025″бағдарламасы да бар. Осы бағдарлама аясында біз жаңа бастаған қәсіпкерлерді қолдаймыз. Бұл субсидиялау және кепілдік беру құралдары”, – деді Зейнелғабдина.
Субсидиялау құралы арқылы ісін жаңа бастаған қәсіпкерлер ауылда немесе моноқалада өз бизнесін ашқысы келетін болса, несие алуға мүмкіндігі бар. Бұл жағдайда оларға 750 миллион теңгеге дейін несие беріледі. Сонымен қатар, қәсіпкерлер айналым капиталын толықтыруға 360 миллион теңгеге дейін қаржы ала алады.
“Субсидиялаудан басқа, несиені кепілдік беру құралы бойынша алуға болады. Егер несие сомасы 180 миллион теңгеден аспаса, онда кепілдік несие сомасына байланысты 85% мөлшерінде болады. Егер кәсіпкер өз бизнесін қалада іске асырса, онда сома жеті миллиард теңгеге дейін артты, бұл ретте мөлшерлеме 6% – ды құрайды”, – деп толықтырды спикер.
Зейнелғабдина атап өткендей, ісін жаңа бастаған қәсіпкерлер республикада төтенше жағдай кезінде және оның күші жойылғаннан кейін де өтініш бере алады. Барлық өтінімдер қаралатын болады.
Сурет: lenta.inform.kz
