Қазақстанда ұлттық даму жоспары бойынша жұмыс аясында 2025 жылға қарай жұмыссыздық деңгейін 4,7%-ға дейін төмендету жоспарлануда, деп хабарлайды «ҚазАқпарат» ХАА.
ҚР Ұлттық экономика министрі Әсет Ерғалиев түсіндіргендей, «әділ әлеуметтік саясат» жалпыұлттық басымдығы нәтижелі жұмыспен қамтуға жәрдемдесуге және әлеуметтік әл-ауқатты қамтамасыз етуге бағытталған жүйелі шараларды іске асыруды көздейді.
«Еңбек нарығын қалпына келтіру және жұмыссыздық деңгейін төмендету үшін жұмыс істеп тұрған жұмыс орындарын жаңғыртып, жаңа жұмыс орындарын құру шаралары қабылданатын болады. Еңбек қатынастарының жаңа прогрессивті нысандарын енгізу жұмыспен қамтудың икемді нысандарын дамытуды қамтамасыз етеді. Өз бетінше тұрақты білім алу және біліктілікті арттыру үшін жағдайлар жасалады, сондай-ақ жұмыс орындарын болжау жүйесі жетілдіріледі», — деді министр.
Ол әлеуметтік қамту саласы еліміздің әлеуметтік Кодексімен реттелетінін атап өтті.
«2025 жылға қарай қабылданған шаралардың нәтижесінде жұмыссыздық деңгейін 4,7%-дан аспайтын деңгейге дейін төмендету болады. Мемлекеттің әлеуметтік төлемдер мен жәрдемақылар жөніндегі барлық әлеуметтік міндеттемелері толық көлемде орындалатын болады. Инфляция деңгейін ескере отырып, әлеуметтік төлемдерді индекстеу қамтамасыз етіледі және әлеуметтік қызмет көрсетудің өтініш беру нысанынан, анықтау нысанына көшу жүзеге асырылады», — деді Ә.Ирғалиев.
Ұлттық даму жоспары үш бағыт: азаматтардың әл-ауқаты, институттардың сапасы және қуатты экономика бойынша 10 жалпыұлттық басымдықтан тұрады. Естеріңізге сала кетейік, ҚР Стратегиялық жоспарлау және реформалар агенттігінің төрағасы Қайрат Келімбетов бұған дейін мемлекеттік жоспарлау жүйесіндегі өзгерістер туралы айтқан болатын.
