Электрондық форматта қанша қылмыстық іс тергелуде, деп Бас прокуратурада хабарлады.
“Цифрлық Қазақстан” мемлекеттік бағдарламасы аясында 2015 жылы Бас прокуратура қылмыстық қудалау органдарында “сотқа дейінгі тергеулердің бірыңғай тізілімі” ақпараттық жүйесін енгізді, соның арқасында қылмыстық істерді тіркеу сатысы толығымен автоматтандырылды. Қылмыстық қудалау органдарына қылмыстық құқық бұзушылықтарды СДТБТ-де дербес тіркеу мүмкіндігі берілді”, – деп атап өтті ҚР Бас прокурорының орынбасары Марат Ахметжанов ведомствоның құқықтық статистика және арнайы есепке алу жөніндегі комитетінің цифрлық жобаларын таныстыру барысында.
Сонымен қатар, Жоғарғы Сот 2016 жылы сот органдарының істерді сотта қарау сатысын автоматтандыратын “төрелік” ведомстволық орталықтандырылған ақпараттық-талдау жүйесін енгізгені атап өтілді.
Аталған жүйелерді интеграциялау қылмыстық құқық бұзушылықты тіркеуден бастап сот үкімін шығаруға дейінгі қылмыстық процестің қалған сатыларын кейіннен ауқымды автоматтандыруға түрткі болды. Ол үшін ІІМ ҚАЖК және Комитеттің деректер базасын интеграциялау процесі тестіленуде.
2017 жылы Бас прокуратурамен “СДТБТ” АЖ базасында “электрондық қылмыстық іс” модулі әзірленді, бұл 2018 жылғы 1 қаңтардан бастап қылмыстық істерді тергеп-тексеруді электрондық форматта жүргізуге мүмкіндік берді.
2020 жылдың қорытындысы бойынша “сотқа дейінгі тергеп-тексерудің бірыңғай тізілімі” ақпараттық жүйесінде 162 783 қылмыстық құқық бұзушылық тіркелді, оның ішінде 73 546 құқық бұзушылық бойынша қылмыстық істер электрондық форматта тергелді, бұл 45,1% – ды немесе іс жүзінде әрбір екіншісін құрайды.
Бас прокуратурада аталған көрсеткіштерге қылмыстық қудалау органдарының ұйымдастыру техникасымен (679 компьютер, 297 монитор, 355 графикалық планшет, 346 сканерлеу және басып шығару құрылғысы, 323 саусақ ізін оқу құрылғысы) жарақтандыру бойынша қабылданған шаралардың арқасында қол жеткізілгені түсіндіріледі, бұл тергеудің цифрлық форматына көшуді жандандыруға ықпал етті.
Сурет: newkuban.ru
