Сенат депутаттары “Қазақстан Республикасының кейбір заңнамалық актілеріне норма шығаруды жетілдіру мәселелері бойынша өзгерістер мен толықтырулар енгізу туралы”Заң қабылдады.
Құжат бойынша негізгі баяндама жасаған ҚР Әділет министрі Марат Бекетаевтың айтуынша, заң жобасы заңдарды әзірлеу, олар бойынша қоғамдық талқылаулар өткізу және заңдарды қабылдау рәсімдерін жетілдіру мақсатында әзірленді.
“Заң жобасында мынадай негізгі ережелер көзделген. Біріншісі – “халық үніне құлақ асатын мемлекет”тұжырымдамасына сәйкес келетін заң шығару қызметінің жаңа кезеңдерін енгізу. Атап айтқанда, мүдделі органдар реттеушілік саясаттың консультативтік құжатын әзірлейді. Бұл құжат мәселелер мен ықтимал шешімдерді көрсетеді. Ол мүдделері қозғалатын мақсатты топтармен талқыланады. Талқылау қорытындысы бойынша заң жобасының тұжырымдамасы әзірленетін болады. Бұл реттеуші органның ресми мәлімдемесі, онда нақты ұсыныстар көрсетілген”, – деді Марат Бекетаев Сенаттың жалпы отырысында.
Екіншіден, министр атап өткендей, заң жобаларын қоғамдық талқылау тәсілдерін кеңейту қарастырылуда. Азаматтарды жаңа реттеуге алдын ала дайындау мақсатында әрбір заң жобасы мен қабылданған заң ақпараттық-түсіндіру бағдарламасымен сүйемелденетін болады.
“Үшінші-заң жобаларының ғылыми құқықтық сараптамасының сапасын арттыру. Бір ұйымның Ғылыми ресурстарымен шектелмей, осы жұмысқа тиісті білімі бар елдегі барлық ғылыми сарапшыларды тарту, осы жұмысты үйлестіруді заңнама және құқықтық ақпарат институтына жүктеу ұсынылады.
Төртіншісі-азаматтар мен бизнеске қосымша міндеттер жүктейтін нормаларға қатысты “өтпелі кезең” тәжірибесін заңнамалық деңгейде белгілеу. Жаңа міндеттерді белгілейтін нормалар қабылданған күннен бастап 60 күннен ерте емес, халық пен бизнестің дайын болуына қарай енгізілетін болады”, – деп Әділет министрлігінің басшысы атап өтті.
“Бесіншіден, қабылданған заңдардың тиімділігіне бағалау жүргізілетін болады. Заңдар қабылданғаннан кейін олардың тиімділігін бағалау ұсынылады. Бұл міндет заңды әзірлеген мемлекеттік органдарға жүктелетін болады. Қабылданған заңның тиімділігін бағалау үшін әзірлеуші орган жаңа реттеудің салыстырмалы нәтижелері бар есепті дайындайды. Бұл есеп құқықтық мониторинг аясында қолданылады, сондай — ақ парламенттік тыңдауда немесе Үкімет сағатында талқылануы мүмкін”, – деп М.Бекетаев түйіндеді.
Сурет: tengrinews.kz
