Қазақстанда Наурыз мейрамын мерекелеу қарсаңында «Таза табиғат» Ұлттық экологиялық жобасын іске асыру басталды. ҚР экология, геология және табиғи ресурстар министрлігі облыс әкімдіктерімен бірлесіп бірқатар өңірлерде ағаш отырғызу, аумақты абаттандыру, бұлақтарды тазарту акцияларын ұйымдастырды. Бұл туралы «ҚазАқпарат» ХАА, министрліктің баспасөз қызметіне сілтеме жасай отыра хабарлайды.
Жоба Түркістаннан басталып, Жамбыл, Маңғыстау, Қызылорда облыстары мен Шымкент қаласында жалғасын тапты. Бұл ел Президентінің орман қорында 2 миллиард ағаш және қалаларда 15 миллион ағаш отырғызу туралы тапсырмасын орындау болды. «Мекенім – жасыл елім» акциясы аясында елімізде 486 мың ағаш отырғызылып, акцияға 60 мың адам қатысты. «Бұл менің ағашым» челленджінде мектеп оқушылары 39 мың ағаш отырғызды. Оған 31 мың адам қатысты. «Мемлекет басшысы Қасым-Жомарт Тоқаев халыққа Жолдауында қоршаған ортаның жағдайын жақсартудың маңыздылығын атап өткен болатын. Жалпыұлттық экологиялық шаралар Nur Otan партиясының сайлауалды бағдарламасында және Қазақстан Тәуелсіздігінің 30 жылдығын мерекелеу шеңберінде көзделген. Басқа өңірлерде осындай іс-шаралар сәуір айында қолайлы ауа райы жағдайында өтеді», — деп атап өтті министр Мағзұм Мырзағалиев Түркістанда акция өткізу кезінде.
Экология министрлігінің басшысы жұмыс сапарымен келген өңірдің құрылып жатқан «жасыл белдеуіне» ағаштардың көпжылдық көшеттері отырғызылды. «Облыс бойынша 3 млн 131 мың гектар орман қоры бар, оның 1 млн 630 мың гектары орманмен қамтылған. Орман тәлімбақтарын дамыту үшін жыл сайын 35-40 млн түрлі ағаш көшеттерін өсіреміз «, — деді облыс әкімі Өмірзақ Шөкеев. Түркістан облысы әкімдігі мен министрлік бірлесіп қабылдаған 2025 жылға дейінгі кешенді жоспарға сәйкес, 2025 жылға дейін өңір аумағында жалпы ауданы 110210 га болатын 170 000 көшет отырғызылады.
Түркістан халықаралық медиафорумына жиналған ардагерлер, қазақстандық журналистер мен түркітілдес елдердің БАҚ өкілдерінің қатысуымен өткен шара барысында Қожа Ахмет Яссауи кесенесінің жанындағы Ботаникалық баққа ағаш отырғызылды. Әуежайға барар жаңа жол бойындағы жеміс алаңында өрік ағашы отырғызылды. Саябақтар, аллеялар абаттандырылып, сенбілік ұйымдастырылды. Мағзұм Мырзағалиев Наурыз мейрамын мерекелеу кезінде Түркістан қаласында «Таза табиғат» акциясын өткізудің ерекше маңыздылығын айтып, акцияны дәстүрлі ету қажеттігін атап өтті. «Түркі әлемінің қасиетті мерекесі әр жер мен әр үйге әрдайым сәттілік пен даңқ әкеледі. Елбасы Нұрсұлтан Әбішұлы Назарбаевтың бастамаларының арқасында қала қонақтарының назары ең алдымен табысты дамып келе жатқан тазалық пен «жасыл белдеу» атмосферасына ауады. Наурыз мейрамын тойлау кезінде аумақтарды көркейту және ретке келтіру дәстүрінің маңызы зор. Мұндай акциялар халықтың экологиялық мәдениетін арттырады, табиғатқа деген ұқыптылықты қалыптастырады. Қазақстанда экология проблемаларына бей-жай қарамайтын, осындай іс-шараларға белсенді қатысатын азаматтар санының өсіп келе жатқаны қуантады», — деп атап өтті министр. Акция ауқымында аталған өңірлерде аумақтарды қоқыстан тазарту бойынша «Бірге – таза Қазақстан» жобасы жалғасын тапты. «Таза су айдындары» акциясы аясында өзендер мен көлдердің жағалаулары тазартылды, бұлақтар мен суару жүйесі тазартылды. Ұлттық парктерде және басқа да табиғи аумақтарда «Саябақтар шеруі» іс-шарасы өтті.
