Қазақстан Үкіметі басшысының орынбасары Бердібек Сапарбаев Денсаулық сақтау министрлігі тауарлар мен қызметтердің сапасы мен қауіпсіздігін бақылау комитетінің Нұр-Сұлтанда ашылған жобалау кеңсесінің қызметімен танысты.
Комитет басшысы Людмила Бюрабекова жобалық кеңсенің жұмысы тауарлар мен қызметтердің сапасы мен қауіпсіздігін бақылау жүйесін жетілдіруге, медициналық қызметтердің сапасын басқару моделін қайта қарауға, дәрілік заттар мен медициналық бұйымдардың айналымы саласын жаңғыртуға, Public Health Laboratories-ті жақсарту, «Салауатты қалалар мен аймақтар денсаулық үшін» ұлттық желісін дамытуға бағытталатынын хабарлады.
«Қызметтердің сәйкестігін міндетті растау жүйесін енгізу есебінен тауарлар мен қызметтердің сапасы мен қауіпсіздігін бақылау жүйесі, сондай-ақ кедендік шекарада тауарлардың қауіпсіздік талаптарына сәйкестігін бағалау жүйесі жетілдірілетін болады», — деді Бюрабекова.
Оның айтуынша, жобалардың басты мақсаты Қазақстан тұрғындарының денсаулығы мен өмірін қорғау жүйесін жаңғырту болып табылады. Сондай-ақ, Людмила Бюрабекова ашылған жобалық кеңсе барлық мемлекеттік органдармен өзара іс-қимыл жасайтынын айтты.
Сонымен қатар, Бердібек Сапарбаев «Дені сау ұлт» жобалық кеңсесінің іске асырылу барысы туралы хабардар болды және медициналық қызметтердің сапасын арттыруға қатысты мәселелер қаралды.
Соңында вице-премьер Қазақстан денсаулық сақтау министрлігі мен жергілікті атқарушы органдарға халықаралық тәжірибені пайдалана отырып, алғашқы медициналық көмек көрсету сапасын арттыруды тапсырды.
