Брифинг барысында ҚР Премьер-Министрінің орынбасары Ералы Тоғжанов мемлекет жаңа карантин кезінде азаматтарға 42,5 мың теңге көлемінде әлеуметтік төлемдер төлей ме деген сұраққа жауап берді, деп хабарлайды zakon.kz.
Бұл әлеуметтік жәрдемақы республикамызда төтенше жағдай кезінде енгізілді. Оны режимнің салдарынан табысынан айырылған азаматтар алды.
Үкімет басшысы орынбасарының айтуынша, Қазақстанда төтенше жағдай режимі енді күшін жойды, сондықтан да жаңа карантин кезінде азаматтарға бұл әлеуметтік жәрдемақы берілмейді.
«Бұл төлем төтенше жағдайға байланысты болды. Ол режим күшін жойғаннан кейін, оны төлеуге құқықтық негіз жоқ. Енді азаматтар мүмкіндігінше жұмыстарын жалғастыруы керек», — деді Тоғжанов.
Сонымен қатар, жаңа екі апталық карантин режимі Қазақстан Республикасында ағымдағы жылдың 5 шілдесінен бастап әрекет ететін болады. Карантиннің белгіленген талаптарын бұзған азаматтарға айыппұл салынады.
Бұрынырақ хабарланғандай, 11 мамырдан бастап елімізде төтенше жағдай режимі тоқтатылды. Оған қарамастан, Қазақстанда коронавирус инфекциясының таралуы әлі тоқтатылмағандықтан карантин шаралары сақталды.
Сурет: qazweek.kz
