Қазақстан Республикасының Президенті Қасым-Жомарт Тоқаев еліміздің төтенше жағдай режимін ұзарту туралы жарлыққа қол қойды. Бұл туралы Президенттің баспасөз қызметі хабарлады.
«Қазақстан Республикасының бүкіл аумағында төтенше жағдайдың қолданысын 2020 жылғы 11 мамырда 00 сағат 00 минутқа дейін ұзартылсын»,-делінген Қасым-Жомарт Тоқаевтың жарлығында.
Төтенше жағдай режимі Республикамызда ағымдағы жылдың 16 наурызынан бастап күшіне енді. Оны короновирустың күрделі жағдайына байланысты Президент енгізді.
Ол кезде төтенше жағдай режимі Қазақстан Республикасында 15 сәуірге дейін болады деп жоспарланған, алайда кейін 1 мамырға дейін ұзартылды.
Бұған дейін мемлекет басшысы егер елде коронавирустық инфекцияның жаңа өршуі болмаса, 11 мамырдан кейін төтенше жағдай режимі тоқтатылуы мүмкін деп айтқан болатын.
Соңғы мәліметтер бойынша, Қазақстанда коронавирусты жұқтырудың 3105 оқиғасы ресми түрде расталды, олардың басым бөлігі — 926 оқиға Алматыда тіркелді.
Сурет: Kaztag.info
