Тәжікстан билігі өткен жылдың күзінде Қазақстанда террористік актілерді дайындағаны үшін сотталған жеті азаматты түрмеге қабылдаудан бас тартты.
Бұл істі Алматы қаласының қылмыстық істер жөніндегі мамандандырылған ауданаралық соты қарады. Процесс нәтижелері бойынша Косимджон Гиесов 18 жылға, Абдухалим Давлатов пен Неъматулло Неъматов 14 жылға, Парвиз Түйчиев, Султони Аминзода, Шарифали Сафаров және Сафиюлло Косимов 12 жылға бас бостандығынан айырылды.
Олардың барлығы Қазақстанда террористік ұйым құруға, оған қатысуға және террорлық шабуылға дайындалуға, сондай-ақ жарылғыш құрылғыларды заңсыз дайындауға, террористік топ құрамында атыс қаруын, оқ-дәрілерді және жарылғыш құрылғыларды сақтау мен алып жүруге кінәлі деп танылды.
Қазақстанның Бас прокуратурасы Тәжікстанның бас прокуратурасына сотталғандарды өз Отанында жазасын өтеу үшін беру мүмкіндігі туралы хат жолдады.
Алайда Тәжікстан бас тартты, деп Орталық Азия жаңалықтар қызметі хабарлайды.
Тәжік тарапының жауап хатында 1998 жылғы 6 наурыздағы бас бостандығынан айыруға сотталғандарды жазасын одан әрі өтеу үшін беру туралы ТМД Конвенциясына сілтеме жасай отырып, Тәжікстан ауыр қылмыстар үшін сотталған адамдарды қабылдамайды делінген. Құжатқа сәйкес сотталғандар жазасын қылмыс жасаған жерде ғана өтей алады.
Төрт сотталушының туыстары оларды «күзет құрбандары»деп санайды. Әңгіме он екі жылға бас бостандығынан айырылған тәжікстандықтар туралы болып отыр.
«Коронавирусқа байланысты шекаралар жабылды. Олар қандай жағдайда ұсталады, біз білмейміз. Сондықтан да біз Қазақстан Бас прокуратурасына туыстарымызды отанында жазасын одан әрі өтеу үшін беру туралы өтініш білдірдік», – деді сотталған Парвиз Түйчиевтің ағасы Фазлиддин Тұраев.
Оның айтуынша, Түйшиев қамауға алынғанға дейін құрылыста жұмыс істеген.
Сурет: nur.kz
