Қазақстан Республикасы Еңбек және халықты әлеуметтік қорғау министрлігінің басшысы Біржан Нұрымбетов ішкі еңбек нарығын қорғау әдістері туралы хабардар етті. Бұл туралы zakon.kz хабарлады.
Нұрымбетов атап өткендей, 1991 жылдан бастап 1 миллион 57 мың этникалық қазақ отанына оралып, оралман мәртебесіне ие болды.
“Өткен жылы Қазақстанға 9993 отбасы келіп, 597 оралман отбасы ШҚО, СҚО, Ақмола, Павлодар, Қостанай облыстарына қоныстанды”, – деді министр.
Оралман мәртебесін ұзарту бойынша бір жолғы акция негізінде азаматтығы алуға құжаттарын тапсыра алмаған этникалық қазақтар үшін 2019 жылы Қазақстан Республикасының азаматтығын 8,2 мың этникалық қазақ алды.
“Өткен жылы шетелдік жұмыс күшін тартуға бөлінген квота аясында жергілікті атқарушы органдар 25,5 мың рұқсат берді, оның 80 пайызы компания басшылары, құрылымдық бөлімшелер менеджерлері мен білікті мамандар үшін. Сонымен қатар, компаниялар кадрлардағы қазақстандық қамтуды қамтамасыз ету бойынша талаптарды сақтауда, олардың үлесі – 96 пайыз”, – деді Нұрымбетов.
Ағымдағы жылы шетелдік жұмысшыларды тарту квотасы өткен жылмен салыстырғанда 40 пайызға төмендетіліп, 29,3 мың бірлікті құрады.
Көші-қон жүйесін жақсарту, елге келген этникалық репатрианттарға және қоныс аударушыларға қолайлы жағдайларды қамтамасыз ету үшін, сондай-ақ ішкі еңбек нарығын қорғау үшін көші-қон процестерін реттеу мәселелеріне қатысты заң жобасы әзірленді.
Атап айтқанда, шетелдік білікті жұмысшыларды жергілікті кадрлармен ауыстыру жөніндегі міндеттемелерді жұмыс берушілерге жүктеу жоспарлануда.
Сурет: fergana.agency
