«Ашық НҚА» сайтында Мемлекет басшысы Жарлығының «Қазақстан Республикасының мемлекеттік органдары жүйесін одан әрі оңтайландыру жөніндегі шаралар туралы»жобасы орналастырылған.
Жаңадан құрылатын және /немесе қайта ұйымдастырылатын мемлекеттік органдарды, сондай — ақ осы Жарлыққа қосымшада көрсетілген мемлекеттік органдарды қоспағанда, «Б» корпусының бос мемлекеттік әкімшілік лауазымдарына орналасуға жалпы конкурстарды жариялауға 2021 жылдың 1 қаңтарына дейін мораторий енгізілсін, — делінген құжатта.
Сондай-ақ Жарлыққа қосымшада көрсетілген мемлекеттік органдарды қоспағанда, мемлекеттік бюджет қаражаты есебінен ұсталатын мемлекеттік қызметшілердің штат санын 2020 жылдың 1 сәуірінен бастап 5 пайызға қысқартуды көздейді.
Штат саны қысқартылуға жатпайтын мемлекеттік органдардың тізбесіне — адам құқықтары жөніндегі Ұлттық Орталық, ауылдар мен ауылдық округтер әкімдерінің аппараттары, Жоғары Сот Кеңесі, қорғаныс министрлігі, Конституциялық Кеңес, Парламент Палаталарының аппараттары, Президент Әкімшілігі, Президент Іс басқармасы, премьер-Министрдің Кеңсесі, Тұңғыш Президент — Елбасының Кеңсесі, Тұңғыш Президент мұрағаты, Орталық сайлау комиссиясы кірді.
Құжат 2020 жылдың 27 қаңтарына дейін көпшілік талқылауда.
Жарлық жобасы ҚР Президенті Қасым-Жомарт Тоқаевтың мемлекеттік қызметшілерді 2020 жылы 5 пайызға қысқарту жөніндегі тапсырмасына сәйкес, сондай-ақ республикалық және жергілікті деңгейлерде (Әлеуметтік сала мекемелерінің қызметкерлерін қоспағанда) мемлекеттік қызметшілер мен квазимемлекеттік сектор қызметкерлерінің санын 2020 жылдан 2023 жылға дейін кезең-кезеңмен қысқарту жөніндегі жоспарды іске асыруға байланысты әзірленді.
Сурет: zakon.kz
