Бүгін 7 ақпанда Астанада Орталық сайлау комиссиясының кеңейтілген отырысы өтті.Онда Орталық сайлау комиссиясы қызметінің 2018 жылғы қорытындысы мен 2019 жылға арналған жоспары қаралды.
Орталық сайлау комиссиясының отырысы адам құқықтары жөніндегі уәкілдің, сайлау комиссияларының жаңа құрамына үміткерлерді ұсынуға қатысқан саяси партиялар өкілдерінің қатысуымен өтті. Бейнеконференция режимінде облыстардың, Астана, Алматы және Шымкент қалаларының аумақтық сайлау комиссияларының өкілдері қатысты.
Отырысты аша отырып, ОСК төрағасы Берік Имашев 2018 жылы ҚР ОСК 15 отырыс өткізіп, 37 қаулы қабылдағанын айтты. 3 сайлау науқаны өткізілді: шығып қалған депутаттардың орнына мәслихат депутаттарын сайлау бойынша 2, Республикалық маңызы бар жаңа әкімшілік бірліктен Сенат депутаттарын сайлау, сондай-ақ ауылдық деңгейдегі 570 әкімді сайлау.
ОСК сайлау процесін ұйымдастыру бөлімінің меңгерушісі Дәурен Ысқақов 2019 жылдың бірінші тоқсанында бес жылдық өкілеттік мерзімінің аяқталуына байланысты сайлау комиссияларының жаңа құрамын құру қорытындылары туралы баяндады. Ол барлық деңгейдегі мәслихаттар сессияларда ағымдағы жылдың 8-15 қаңтар аралығында комиссияның жаңа құрамын қалыптастырғанын айтты.
Ортсайлауком қызметкерлерінің деректері бойынша барлығы 10202 сайлау комиссиясының құрамы қалыптасты: 232 аумақтық және 9970 учаскелік.
2014 жылмен салыстырғанда сайлау комиссияларының саны 3105-ке қысқарды. Сайлау заңнамасындағы жаңашылдықтарға сәйкес округтік комиссиялардың құрамы құрылған жоқ.
Учаскелік комиссиялардың сандық құрамы (5-тен 11 мүшеге дейін) сайлаушылардың санына байланысты анықталды. Бұл сараланған тәсіл учаскелік комиссия мүшелерінің жалпы санын 1905-ке қысқарту, сайлаушылар саны көп учаскелер комиссияларының құрамын ұлғайтуға мүмкіндік беріп, барлық сайлау рәсімдерін оңтайландырады
Сарапшылар Ортсайлауком жұмысының жандануы Қазақстан Президентінің кезектен тыс ықтимал сайлауымен байланысты деп есептейді.
Сулет: zakon.kz
