Қазақстанның Экология министрі Мағзұм Мырзағалиев Министрлер Кабинетінің отырысында республикамызда пайдалы қазбалардың жаңа кен орындарын ауқымды іздестіру жұмысы жүргізілетінін хабарлады, деп жазады “ҚазАқпарат” жаңалықтар ресурсы.
Экология министрлігінің басшысы біздің мемлекетіміздің “жетілген” кен орындарында өндіру көлемінің төмендеуі байқалып отырғанын, осыған байланысты кәсіпорындарды шикізатпен қамтамасыз ету қиындап отырғанын айтты.
Сонымен қатар, ол 2025-2040 жылдарға қарай Орловское, Малеевское, Тишинское және Риддер-Сокольное сияқты ірі кен орындары қорларының сарқылуы мүмкін екенін нақтылап айтты.
Осыған байланысты, Мағзұм Мырзағалиевтің айтуынша, ол басқаратын ведомствода 2021-2025 жылдарға арналған геологиялық барлаудың мемлекеттік бағдарламасы әзірленді.
Бұл бағдарламада Шығыс, Орталық және Солтүстік Қазақстанда ірі ауқымды іздестіру жұмыстарын жүргізу көзделген.
Мырзағалиев пайдалы қазбалардың жаңа кен орындарын ашу еліміздің қала құраушы кәсіпорындарының үздіксіз жұмысын қамтамасыз етуге мүмкіндік беретінін қоса айтты.
Сурет: inform.kz
