Мемлекет басшысы Қасым-Жомарт Тоқаев Қазақстанның қоршаған ортасының ластануын болдырмау шаралары қамтылған Экологиялық кодекске қол қойды. Бұл туралы “ҚазТАГ” ақпарат агенттігі хабарлады.
Тоқаев қол қойған кодекс біздің республикамызда осы жылдың 1 шілдесінен бастап күшіне енеді. Құжат қоршаған ортаға әсер етудің жаңа тәсілдерін бағалауды, сондай-ақ өндіріс және тұтыну қалдықтарын басқаруды жетілдіруді реттейді.
Осы кодекске қатысты Экология министрлігінің басшысы Мағзұм Мырзағалиев құжатта еліміздегі экологияны жақсартуға мүмкіндік беретін тиімді шаралар белгіленгенін мәлімдеді. Министр кодекс барлық заманауи сын-қатерлерге жауап беретінін атап өтті.
Мырзағалиевтің айтуынша, кодекстің қабылдануы біздің мемлекеттің экологиясын тұрақты және берік жолға бағыттайды.
Сондай-ақ, Экология министрлігінің басшысы биылғы жылы өзі басқарып отырған министрлікке Экологиялық кодекстің ережелерін іске асыру үшін 150-ге жуық нормативтік-құқықтық актілер әзірлеу қажет екенін атап өтті.
