Қазақстан Республикасы Үкіметінің басшысы Асқар Мамин Индустрия және инфрақұрылымдық даму министрлігіне осы жылдың 1 шілдесіне дейінгі мерзімде өнеркәсіпті дамыту қорын құруды тапсырды. Бұл туралы Sputnik Қазақстан жаңалықтар ресурсы хабарлайды.
Бұл қорды мамыр айында құруды Қазақстан президенті Қасым-Жомарт Тоқаев тапсырды. Қор көлік жасау саласын қоса алғанда, серпінді өңдеуші жобаларға қол жетімді несие беруді қамтамасыз етуге бағытталатын болады.
«Қордың жұмысы жұмыс істеп тұрған кәсіпорындарды жаңғыртуға, жаңа өндірістерді ұйымдастыруға және импортты алмастыруды қамтамасыз етуге бағытталады. Осыған орай, индустрия министрлігіне 1 шілдеге дейін өнеркәсіпті дамыту қорын құруды қамтамасыз етуді тапсырамын», — деді Мамин Үкімет отырысы барысында.
2020 жылдың 5 айының қорытындысы бойынша, экономикалық өсімнің төмендеуіне қарамастан, көлік жасауда өндіріс көлемі 535 млрд теңгеге жетті, бұл өткен жылдың көрсеткішінен 18,5 пайызға жоғары.
«Қазір көлік жасау саласында үш мыңға жуық негізгі кәсіпорын бар, олар өнімнің кең спектрін – жинақтаушы және қосалқы бөлшектерден жоғары дәлдікті техниканы құрастыруға дейін игеріп, экономиканың мұнай — газ, металлургия және агроөнеркәсіп сияқты базалық секторларының қажеттіліктерін қамтамасыз етеді»,-деп толықтырды Премьер-Министр.
Сурет: sputniknews.kz
