Коронавирустың күрделі жағдайына байланысты Нұр-Сұлтан мен Алматының барлық отандық авиатасымалдаушыларының тұрақты және тұрақты емес авиарейстері тоқтатылады. Бұл туралы Қазақстанның Азаматтық авиация комитетінің баспасөз қызметі хабарлады.
Нұр-Сұлтаннан 16 ішкі бағыт бойынша 320 тұрақты авиарейс, ал Алматыдан 18 ішкі бағыт бойынша 295 рейс уақытша тоқтатылады.
Қазақстандық авиакомпаниялар ұшпайтын рейстердің билеттері үшін ақшалай қаражатты толық көлемде және айыппұлсыз өтеуі тиіс. Бұл төтенше жағдай режимін қамтамасыз ету жөніндегі мемлекеттік комиссия отырысының осы жылғы 16 наурыздағы хаттамасында көзделген.
Адамдардың жаппай шоғырлануын болдырмау мақсатында қазақстандық азаматтық авиация комитеті ел азаматтарын биылғы жылдың 22 наурызынан бастап Нұр-Сұлтан және Алматы қалаларының әуежайларына бармауға шақырады.
Бүгінгі күннен бастап Нұр-Сұлтан мен Алматыда карантин режимі жұмыс істей бастады. Бұл Қазақстанның басқа қалаларында коронавирустық инфекцияның таралуын болдырмау үшін жасалды.
Соңғы мәліметтер бойынша, Қазақстанда коронавирусты жұқтырудың 44 жағдайы тіркелген, оның ішінде 25-і Нұр-Сұлтанда, 19-ы Алматыда.
Сурет: zakon.kz
