Денсаулық сақтау министрі Алексей Цойдың “цифрлық технологиялар арқылы қашықтықтан медициналық қызмет көрсету тәртібін бекіту туралы” бұйрығының жобасы жақын арада бекітілуі мүмкін. Бұл туралы Қазақстан Республикасы Денсаулық сақтау министрлігінің баспасөз қызметі хабарлады.
Құжат ағымдағы жылдың 28 тамызына дейін жария талқылау үшін қолжетімді болады.
Ведомство қашықтықтан медициналық көмек көрсетудің басты міндеттері пациенттің шағымдары мен анамнез деректерін алдын алу, жинау және талдау, емдеу-диагностикалық және оңалту іс-шараларының тиімділігін бағалау, пациенттің денсаулық жағдайын медициналық бақылау болатынын атап өтті.
Көмек көрсетудің бұл тәсілі емдеу-диагностикалық іс-шаралар жоспарын тағайындау және түзету кезінде шешім қабылдауға және тиісті бағыттарды, оның ішінде уақытша еңбекке жарамсыздық парағы мен анықтамасын, дәрілік заттар мен медициналық бұйымдар рецептерін қалыптастыруға мүмкіндік береді.
Қашықтықтан медициналық қызмет көрсетуді амбулаториялық, стационарлық, стационарды алмастыратын жағдайларда немесе үйде алуға болады.
Сурет: sputniknews.kz
