Қазақстан мамандарды сертификаттау жүйесіне көшуде. Бұл туралы ҚР Еңбек және халықты әлеуметтік қорғау министрі Біржан Нұрымбетов кәсіби стандарттарды әзірлеу мәселелері жөніндегі Басқарушы комитеттің отырысында мәлімдеді, деп ХАА “ҚазАқпарат” тілшісі хабарлайды.
“Ұлттық біліктілік жүйесі үш бөлімнен тұрады. Біріншісі-жұмыс берушінің жұмысқа қабылданатын адамның білімі мен іскерлігіне қойылатын талаптары. Бұл талаптарды біз “кәсіби стандарт”деп атаймыз. Екіншісі-кәсіби стандартты әзірлегеннен кейін оған біздің білім беру стандарттары мен бағдарламаларымызды бейімдеу қажет. Сол кезде білім беру ұйымдары бизнес, экономика сұраныстарына сәйкес мамандарды даярлайтын болады. Ұлттық біліктілік жүйесінің үшінші бөлігі – білімді тәуелсіз бағалау, яғни сертификаттау”, – деді Біржан Нұрымбетов.
Оның айтуынша, диплом білімін растайтын құжат болып табылады, бірақ дамыған елдерде маман дипломына қаралмайды. Олар мамандарды тиісті сертификат беретін біліктілікті растайтын тәуелсіз орталықтарға жібереді. Сертификаттың құндылығы дипломның құндылығынан жоғары. Мұндай жүйе қазір Қазақстанда қалыптасады.
Министр өткен жылы ҚР-да 70 кәсіби стандарт әзірленгенін, ал ағымдағы жылдың соңына дейін тағы 480 кәсіби стандарт әзірленгенін хабарлады. Дүниежүзілік банктің мәліметінше, Қазақстан экономикасын толық қамтамасыз ету үшін 550 кәсіби стандарт қажет.
Комитет отырысына мәдениет және спорт, сандық даму, инновация және аэроғарыштық қызмет, энергетика министрліктерінің өкілдері, сондай-ақ кәсіби стандарттарды әзірлеушілер, “Атамекен” ҰКП және “Ernst&Young”консалтингтік компаниясының өкілдері қатысты.
