Қазақстанда жеке тұлғалар үшін мүлік пен жер салығын біріктіруге ниетті, деп мәлімдеді ҚР Ұлттық экономика вице-министрі Мәди Такиев салық салу және салық ахуалын жетілдіру мәселелері бойынша жаңа заң жобасының тұсаукесері кезінде айтты.
«Жеке тұлғалардың мүлкі мен жеріне салынатын салықтарды салық элементтерін өзгертпей, бір салыққа біріктіру ұсынылады. Яғни 2 салық бірыңғай төлеммен төленеді. Бұл түбіртектерді толтыру және банк комиссияларын төлеу шығындарын қысқартуға мүмкіндік береді», — деді Мәди Такиев.
Сондай-ақ, ол пәтер иелері үшін жер салығын алып тастау ұсынылғанын атап өтті.
«Бұл салық сомасының аздығы, есептеу күрделілігі мен әкімшілік ету шығындарына байланысты. Халыққа қолайлы болу мақсатында көлікке салық төлеу мерзімін ауыстыру ұсынылады. Қазір салық сол жылдың аяғына дейін төленеді. Келесі жылдың 1 сәуіріне дейін төлеу ұсынылады»,-деді вице-министр.
Сонымен қатар ол сатып алулар үшін төленетін бонустарға салық салуды алып тастауды ұсынды.
«Жеке тұлғалар үшін тағы бір өзгеріс – бұл жүзеге асырылған сатып алулар үшін есептелген бонустарға салық салуды алып тастау бойынша ұсыныс. Азаматтық-құқықтық келісімшарттар бойынша ЖТС есептеу кезінде міндетті зейнетақы жарналарының мөлшерін шегеру қарастырылмаған. Шегеруді қолдану және қосарланған салық салуды жою тәртібін нақтылау ұсынылады», — деп қорытындылады Такиев.
Сурет: inform.kz
