Қазақстан Үкіметі басшысы Асқар Мамин Алматы облысына жұмыс сапары аясында “Лукойл Лубрикантс Орталық Азия” ЖШС-ның майлау материалдарын өндіретін зауытының ашылу салтанатына қатысты. Бұл туралы ҚР премьер-министрінің баспасөз қызметі хабарлады.
Салтанатты рәсім кезінде Асқар Мамин Қазақстанда еліміздің көмірсутегі секторына 9,5 миллиард доллар инвестициялаған “Лукойл” мұнай компаниясы зауытының ашылуының маңыздылығын атап өтті.
Жаңа зауыт жылына 100 мың тонна өнім өндіретін болады деп жоспарлануда. Дайын өнім Қазақстанның және Орталық Азия елдерінің, сондай-ақ Қытайдың, Ауғанстанның және Монғолияның ішкі нарығын қамтамасыз ететін болады.
ҚР Үкіметінің ақпараты бойынша, зауыт құрылысына және жарақтандыруға салынған инвестициялардың жалпы көлемі шамамен 94 миллион долларды құрады. Жоба еліміздің заңнамасының талаптарына және өнеркәсіптік қауіпсіздік саласындағы халықаралық құқық нормаларына сәйкес жүзеге асырылды.
Бұдан басқа, “Лукойл” КАҚ мен “ҚазМұнайГаз “ҰК” АҚ “Қазақстан Республикасы аумағындағы учаскелерді бірлесіп зерттеу туралы” келісімге қол қойды.
