Денсаулық сақтау министрі Елжан Біртановтың қазақстандық компаниялардың өкілдерімен бейне кездесуі өтті. Кездесу барысында коронавирус індеті жағдайында Қазақстанға қажет дәрі-дәрмектермен және медициналық бұйымдармен қамтамасыз етуге қатысты өзекті мәселелер талқыланды.
Эпидемияға байланысты шетелдік медициналық дәрі-дәрмектер мен бұйымдарды сатып алу кезінде елеулі тәуекелдер бар. Осыған байланысты қазақстандық фармацевтика саласы мен медициналық өнеркәсіптің алдында тұрған негізгі міндеттер өндірістің қажетті көлемін жолға қою, сондай-ақ дәрі-дәрмектермен және медициналық бұйымдармен қамтамасыз ету болып табылады.
Сондай-ақ, кездесуге қатысушылар қазақстандық тест-жүйелердің өнеркәсіптік өндірісін қысқа мерзімде жолға қоюға және қажетті медициналық бұйымдардың, соның ішінде жеке қорғану құралдарының көлеміне байланысты мәселелерді қарастырды.
Сонымен қатар, коронавирусты алдын алу және емдеу мақсатында қолданылатын иммунобиологиялық дәрілік заттар мен басқа да препараттарды өндіруге қолда бар қуаттарды пайдалануға бағытталған шаралар ұсынылды.
Оның ішінде кездесуде денсаулық сақтау министрлігі отандық фармацевтикалық және медициналық өнеркәсіптермен өзара іс-қимылды күшейтуі тиіс деген пікір айтылды. Бұл Қазақстандағы фармацевтика саласының дамуына жағымды әсер етеді және импортқа тәуелділікті азайтады, бұл коронавирус індетінің дамуының кез келген сценарийіне қажетті дайындықты қамтамасыз етеді.
Сурет: zakon.kz
