Біздің республикамыздың бас санитарлық дәрігері Айжан Есмағамбетова Қазақстанда коронавирус жұқтырған адамдарға көмек көрсету үшін барлық медицина қызметкерлері қатыстырылуы мүмкін деп мәлімдеді. Бұл туралы “Қазақпарат” ақпарат агенттігі хабарлайды.
Брифинг барысында Айжан Есмағамбетова төтенше жағдай режиміне байланысты республиканың барлық медициналық ұйымдарында жоспарлы медициналық көмек қысқартылғанын атап өтті.
“Қажет болған жағдайда медициналық ұйымдардың барлық медқызметкерлері коронавирус инфекциясымен ауыратын науқастарға медициналық көмек көрсету үшін шақыртылуы мүмкін”, – деді ол.
Сондай-ақ, бас санитарлық дәрігер бүгінгі таңда коронавирус инфекциясының таралуына қарсы күрес шараларына 16 мың медицина қызметкері қатыстырылғанын атап өтті.
Бұған дейін Айжан Есмағамбетова Қазақстанда 120 медицина қызметкерлері коронавирус жұқтырғанын, олардың 67-сі ауру адамдарға немесе инфекцияға күдікті адамдарға көмек көрсету кезінде вирус жұқтырып алғанын хабарлаған.
Соңғы мәліметтер бойынша, Қазақстанда коронавирус ауруының 629 оқиғасы анықталды, індеттің таралуын болдырмау үшін барлық шаралар жасалуда.
Сурет: ria.ru
