Қазақстан премьер-министрі Асқар Маминнің басшылығымен өткен селекторлық Үкімет отырысы барысында суармалы жерлердің ирригациялық инфрақұрылымын жетілдіру мәселесі талқыланды. Бұл туралы zakon.kz жаңалықтар ресурсы хабарлайды.
Отырыста геология, экология және табиғи ресурстар, ауыл шаруашылығы министрліктерінің басшылары, сондай-ақ Түркістан және Қызылорда облыстарының әкімдері баяндама жасады.
2020 және 2021 жылдар ішінде Қазақстан Республикасында 6785 км каналды, 4 су қоймасын, 4 су торабын, сондай-ақ 239 тік дренаж ұңғымасын және 23000 жуық өзге де су шаруашылығы құрылыстарын қайта жаңарту жоспарлануда.
Ирригациялық инфрақұрылымды дамыту және жаңарту жобаларын іске асыру Алматы, Жамбыл, Түркістан, Қызылорда және Ақтөбе облыстарында қосымша 500 мың гектарға жуық жерді суландыруға мүмкіндік береді. Жобаға шамамен 274 миллиард теңге қарастырылған. 88000 жұмыс орнын ашу жоспарланған.
Айналымға енгізілетін жерлердегі ауыл шаруашылығы өнімдерінің жалпы көлемі жыл сайын 165 миллиард теңгеге жетеді, сондай-ақ сауда, өнімді қайта өңдеу және мал шаруашылығы секторларына мультипликативтік әсер етеді.
Министрлер кабинеті басшысының айтуынша, жерді суландыру үшін инфрақұрылымды ауқымды кеңейту мемлекет экономикасының құрылымындағы ең маңызды сектор болуы тиіс агроөндірістік кешеннің дамуына жаңа серпін береді.
«Қабылданып жатқан шаралар 2024 жылға қарай жеміс-көкөніс өнімдері бойынша 100 пайыздық импорт алмастыруды жүргізуге мүмкіндік береді», — деп атап өтті ол.
Асқар Мамин экология, ауыл шаруашылығы министрліктеріне және облыс әкімдіктеріне осы жобалардың орындалуын тездетуді, сондай-ақ ақшалай қаражаттың тиімді игерілуіне тиісті бақылауды қамтамасыз етуді тапсырды. Бұл ретте жаңа жұмыс орындарын қамтамасыз етудің маңыздылығына ерекше назар аударылды.
Сурет: zakon.kz
