Президент жанындағы әйелдер істері және отбасылық-демографиялық саясат жөніндегі ұлттық комиссияның басшысы Гүлшара Әбдіқалықованың төрағалығымен Ұлттық комиссияның отырысы өтті.Оның барысында Қазақстанда гендерлік бюджеттеуді енгізу мәселесі қаралды.
“Бүгін күн тәртібінде келесі мәселелер қаралды. Бірінші мәселе – қолданыстағы мемлекеттік және бюджеттік жоспарлау жүйесіне гендерлік бюджеттеуді енгізу жоспарының жобасын әзірлеу кезінде мемлекеттік және бюджеттік жоспарлаудың ұқсас жүйесі бар елдерде гендерлік бюджеттеуді енгізу тәжірибесін зерделеу қорытындылары туралы.
Екінші мәселе – ұлттық кәсіпкерлер палатасы іскер әйелдер кеңесінің өзін-өзі жұмыспен қамтыған ауыл әйелдерін кәсіпкерлік қызметке тарту, шағын несиелеудің қолжетімділігін және қосылған құнның логистикалық тізбегін қалыптастыру қызметін жандандыру туралы.
Үшінші мәселе – Қазақстан Республикасында 2030 жылға дейінгі отбасылық және гендерлік саясат тұжырымдамасын іске асыру жөніндегі 2017-2019 жылдарға арналған іс-шаралар жоспарын және Шымкент қаласында “Қазақстан отбасында зорлық-зомбылықсыз” пилоттық жобасын іске асыру барысы туралы. Төртінші мәселе – түркі тілдес елдерде отбасылық құндылықтарды алға тарту тәжірибесін жинақтау”, – деді Әбдіқалықова.
Сонымен қатар, ол барлық қатысушыларға экономиканың көптеген секторларында көшбасшы болып отырған еліміздің әйелдері мемлекет басшысы Қасым-Жомарт Тоқаевтың Қазақстан халқына Жолдауында қойған міндеттерді жүзеге асыруға кіріскенін хабарлады.
Сурет: 24.kz
