Қазақстанда Еуразиялық экономикалық одақ елдерінен келіп,біздің мемлекетіміздің аумағында ұзақ уақыт қалуды көздейтін автокөліктер үшін міндетті уақытша тіркеу енгізуді жоспарлап отыр. Бұл туралы ҚР Ішкі істер министрлігінің баспасөз қызметі хабарлады.
“Мәселе аталған көлік құралдарын пайдалануға тыйым салу, қандай да бір шектеу шараларын енгізу туралы емес немесе кедендік рәсімдеу, салық төлеу туралы болып отырған жоқ. Мәселе тек уақытша тіркеу туралы,оны автокөлік иелері “онлайн” режимінде тегін жүргізе алады”,-деп нақтылады ІІМ баспасөз қызметі.
Ведомствода шетелдік автокөліктерді есепке алу құқық бұзушылықтарды арнайы автоматты жүйелермен тіркеуге мүмкіндік беретінін атап өтті. Бұл қысқа мерзімде тәртіп бұзушыны табуға және оны жауапкершілікке тартуға мүмкіндік береді.
ІІМ-де күніне жүздеген жол қозғалысы ережесін бұзу орын алуы мүмкін. Шетелдік, тіркелмеген автомобильдердің жүргізушілері де тәртіп бұза алады.Оларды кейін табу қиын.
