Қазақстан Республикасы Парламенті Мәжілісінің пленарлық отырысында палата спикері Нұрлан Нығматулиннің басшылығымен депутаттар «ардагерлер туралы» және «Қазақстан Республикасының кейбір заңнамалық актілеріне әлеуметтік қамсыздандыру мәселелері бойынша өзгерістер мен толықтырулар енгізу туралы»заң жобаларын талқылады. Бұл туралы zakon.kz хабарлады.
«Ардагерлер туралы» заң жобасына қатысты мәжілісмен Гүлшара Әбдіқалықова бұл құжат Отан алдындағы әскери және азаматтық борышын атқарған ардагерлер мен қазақстандықтардың құқықтары мен әлеуметтік мүдделерін қорғау мәселелерін реттеуге бағытталғанын атап өтті.
«Заң жобасына сәйкес, 5 әлеуметтік қорғалатын санаттағы ардагерлер мәртебесі белгіленеді. Құжатта Ұлы Отан соғысының ардагері және жеңілдіктер мен кепілдіктер бойынша ардагерлерге теңестірілген азаматтар мәртебесін белгілеу ұсынылады. Сондай — ақ, өзге елдердің аумағындағы жауынгерлік іс-қимыл ардагерлерінің жеке тобына бөлу және бейбітшілік пен қауіпсіздікті қамтамасыз ету бойынша елдің халықаралық міндеттемелерін орындаған әскери қызметшілерді жатқызу жоспарланып отыр», — деді Әбдіқалықова.
Оның айтуынша, құжатта ардагерлерді әлеуметтік қолдаудың кейбір шараларын белгілеу қарастырылған.
«Қазақстан Республикасының кейбір заңнамалық актілеріне әлеуметтік қамсыздандыру мәселелері бойынша өзгерістер мен толықтырулар енгізу туралы» екінші заңға сәйкес ардагерлерге бірқатар әлеуметтік-құқықтық кепілдіктер беру көзделіп отыр.
«Әлеуметтік еңбек батырларына және Еңбек Даңқы орденінің үш дәрежелі кавалерлеріне мемлекеттік арнайы жәрдемақы көлемі 138,63 АЕК-ке дейін ұлғайтылатын болады. Сондай — ақ, басқа елдердегі соғыс ардагерлері үшін 6,19 АЕК көлемінде арнайы мемлекеттік жәрдемақы белгілеу жоспарлануда», — деді депутат.
Сурет: kokshetau.asia
