Қазақстанда байланыс сапасы параметрлерін бұзғаны үшін айыппұлды 10 есеге арттыруға ниетті. Бұл туралы ҚР цифрлық даму, инновациялар және аэроғарыштық даму министрі Бағдат Мусин хабарлады, деп “ҚазАқпарат”ХАА хабарлайды.
“Биыл сапа стандарттары 4G үшін төменгі шек 5 Мб/сек, ал 3G үшін 1,5 МБ/сек құрайды. Бұл байланыс операторлары үшін ең төменгі шектер. Егер төменгі шек анықталса, айыппұл салуға құқығымыз бар”, – деп түсіндірді ҚР цифрлық даму, инновациялар және аэроғарыш даму министрі. Сондай-ақ, ол қазіргі уақытта жазып беріліп отырған байланыс сапасының параметрлерін бұзғаны үшін айыппұлдар 200 мың теңгеге жуық соманы құрайтынын атап өтті. Ведомство бұл соманы 10 есеге көтеруге ниетті. “Біз қазір оларды 10 есе көтеру керек деп айтамыз. Қазір депутаттармен талқылау жүріп жатыр. Біз оларды көтереміз, байланыс операторларына айыппұлдың ең төменгі шегі 2 миллион теңгеге жуық болады”, – деп Бағдат Мусин толықтырды. Естеріңізге сала кетейік, бұған дейін ҚР цифрлық даму, инновациялар және аэроғарыш даму министрі Бағдат Мусин ХҚКО операторлары тиісті кодсыз Қазақстандықтардың дербес деректеріне қол жеткізе алмайтынын хабарлаған болатын.
