Біздің республикамызда «Бәйтерек» холдингінің лауазымды тұлғаларына қатысты қылмыстық іс қозғалды. Бұл туралы бүгін өткен брифинг барысында сыбайлас жемқорлыққа қарсы іс-қимыл агенттігінің бірінші департаментінің аса маңызды істер жөніндегі тергеушісі Данияр Биғайдаров мәлім етті.
Ол қазақстандық Холдингтің лауазымды тұлғалары 197 миллион теңге көлемінде ақша қаражатын жымқырды деп күдікке ілінгенін айтты.
Сонымен қатар, сыбайлас жемқорлыққа қарсы ведомство өкілі бұл қаражат техникалық даму жөніндегі Ұлттық агенттіктің бизнес-моделін қайта құру бойынша консультациялық қызметтерге бөлінгенін атап өтті.
Қазіргі уақытта Қазақстанның сыбайлас жемқорлыққа қарсы қызметі сотқа дейінгі тергеудің барлық қажетті рәсімдерін жүргізіп жатыр.
Сондай-ақ, брифинг барысында Данияр Биғайдаров елордалық сәулет, қала құрылысы және жер қатынастары басқармасының басшысы мен бірқатар лауазымды тұлғаларына қатысты қылмыстық іс ашылғанын айтты.
Биғайдаровтың айтуынша, олар Нұр-Сұлтандағы жер учаскелеріне тексеру жүргізуге бөлінген 20 миллион теңге көлемінде бюджет қаражатын жымқырды деп күдікті.
Сурет: myseldon.com
