Қазақстан Республикасында азық-түлік себетіне кіретін азық-түлік өнімдерінің тізімін кеңейту жоспарлануда. Бұл туралы Үкімет басшысы Асқар Маминнің депутаттық сауалға берген жауабында айтылды.
Азық-түлік себетін есептеумен Статистика комитетінің қызметкерлері тамақ өнімдерін тұтынудың ғылыми негізделген физиологиялық нормаларына сәйкес айналысады.
Азық-түлік себеті мемлекеттегі ең төменгі күнкөріс деңгейін есептеу үшін пайдаланылатын тұтыну себетінің құрамдас бөліктерінің бірі болып табылады. Есеп айырысу құрылымындағы азық-түлік себетінің бір бөлігі 55 пайызға жетеді, қалған 45 пайызы азық-түлік емес үлесті құрайды.
Статистика комитетінің ақпаратына сәйкес, ең төменгі күнкөріс деңгейі – Қазақстан азаматына базалық қажеттіліктерді қамтамасыз ету үшін қажетті сома – ағымдағы жылдың қыркүйегінде 35 мың 671 теңгені құрады. Өткен жылдың желтоқсанымен салыстырғанда бұл көрсеткіш 20 пайызға, ал 2019 жылдың қыркүйегінен бастап 12,3 пайызға өсті.
Бұған дейін мәжілісмендер Аманжан Жамалов пен Артур Платонов Асқар Маминге ең төменгі күнкөріс деңгейін көтеру туралы өтініш жасаған болатын, өйткені депутаттардың пікірінше, ол республикадағы нақты жағдайды көрсетпейді.
«Соңғы жылдары халықтың тамақ өнімдерін тұтынуында болған өзгерістер және елдің азық – түлік нарығының толымдылық ерекшелігі жағдайында Қазақ тамақтану академиясының ұсынымдарын ескере отырып, азық-түлік тауарларының тізбесін 43-тен 51 атауға дейін кеңейту, тәуліктік энергетикалық құндылығын 2 175 ккал-дан 2 330 ккал-ға дейін тиісінше арттыра отырып, өнімдерді тұтыну нормасын ұлғайту мәселелері пысықталуда», — деп атап өтілген премьер-министрдің жауабында.
Сурет: kursiv.kz
