Біздің елімізде азаматтардың дербес деректерін қорғау күшейтілетін болады. Бұл туралы сандық даму, инновациялар және аэроғарыш өнеркәсібі министрі Бағдат Мусин мәлімдеді, деп хабарлайды zakon.kz.
Мемлекет басшысы ақпараттық қауіпсіздік бойынша дербес деректерді қорғауды күшейтуді тапсырды. Біз онда бірнеше нәрсені енгіземіз. Біріншісі — сандық келісім. Адам бүгін ХҚКО-ға келіп, ЖСН көрсетсе, ХҚКО операторы барлық деректер базасына кіре алады. Енді біз ХҚКО операторы адам кодты жазғанға дейін деректер базасына қол жеткізе алмайтын қағидатты қолданатын боламыз. Ал код SMS-хабарламамен адамға жіберіледі, — деді Бағдат Мусин Орталық коммуникациялар қызметінде өткен брифингте.
Ол мұндай қағидат барлық жерде қолданылатынын атап өтті. Қазір оны үш ХҚКО-да тестілеуде.
26 қаңтарда Қазақстан Президенті Қасым-Жомарт Тоқаев Үкіметтің кеңейтілген отырысында азаматтардың дербес деректерін қорғауды күшейтуді және заңнамаға тиісті түзетулер қабылдауды тапсырған болатын.
