Қазақстанның Индустрия және инфрақұрылымдық даму министрлігі Техникалық байқау орталықтарының қазақстандықтардың автокөліктеріне жалған техникалық байқау жүргізуін болдырмау үшін талаптардың күшейтілетінін мәлімдеді. Бұл туралы ведомствоның баспасөз қызметі хабарлады.
“2019 жылдың сәуір айында “Жол жүрісі туралы” заңға техникалық байқау операторларының бақылау-диагностикалық жабдықтарынан ақпарат беретін арнайы бағдарламаларға қойылатын талаптарды белгілеу бөлігінде өзгерістер мен толықтырулар енгізілді. Бүгінгі таңда мамандандырылған бағдарламаларға қойылатын талаптар жобасы ҚР Әділет министрлігінде мемлекеттік тіркеуден өтуде. Бұл талаптар техникалық байқауға автокөлікті ұсынбай техникалық байқауды өткізу фактілерін болдырмауға, сондай-ақ деректерді “қолмен” енгізуді (фотошоп) болдырмауға бағытталған”, – делінген хабарламада.
Ведомство ақпаратына сәйкес, техникалық байқауды тоқтату мәселесі Үкіметте талқыланбайды да, өйткені техникалық байқау автомобильдің ақаулығынан апатты жағдайларды болдырмауға мүмкіндік беретін жалпы әлемдік тәжірибе болып табылады.
“Басқа елдерде тіркелген автокөліктерді техникалық байқаудан өткізетін тұлғалардың қызметіне келер болсақ, ҚР ИИДМ техникалық байқау операторларының тізіліміне енгізілген операторлар міндетті техникалық байқауды ұйымдастыру және өткізу тәртібінің сақталуына мемлекеттік бақылау жүргізетінін атап өткен жөн.Техникалық байқау операторларының тізіліміне енгізілмегендерге тексеру жүргізу министрліктің құзыретіне кірмейді”,-деп түйіндеді ведомствоның баспасөз қызметі.
Сурет: Inform.kz
