Біздің республикамызға ЕАЭО-ға мүше елдерден әкелінген автомобильдердің иелері Қазақстанда автокөлікшілер партиясын құруды жоспарлап отыр, деп хабарлайды ҚазТАГ ақпараттық ресурсы.
Жаңа партияны құру және оның мақсаты туралы Одақ мемлекеттерінен әкелінген автокөлік иелерінің бастамашыл тобының мүшесі Сүлеймен Ахметов егжей-тегжейлі айтып берді.
Оның айтуынша, партия Қазақстандағы жолдардың күйіне, жол қозғалысы ережелерін бұзу айыппұлдарына, сондай-ақ көлік құралдарына салынатын салық пен бағаларға қатысты мәселелермен айналысатын болады.
Сонымен қатар, Ахметов партия көтеретін басты мәселелердің бірі ЕАЭО елдерінен Қазақстанға әкелінетін көліктер мәселесі болып табылатынын атап өтті.
“Соңғы төрт күнде біз қол жинап жатырмыз. Партияның жарғысы мен бағдарламасын әзірлейтін боламыз. Біз үкіметтік емес ұйымды емес, партия құруды шештік, себебі біз тым көппіз, шетелдік нөмірлері бар 200 мыңға жуық адамбыз”, – деді ол.
Парламент сайлауына қатысу туралы айта келе, Сүлеймен Ахметов партия оған қатыспайтынын атап өтті, өйткені ол барлық қазақстандық автомобильшілердің мәселелерін шешу үшін ғана құрылады.
“Бұл консервативті партия болады. Оппозициялық емес және ағартушылық емес, ол халықтық болады”, – деп атап өтті Ахметов.
Сурет: 24.kz
