Бейнеконференция байланысы арқылы Қазақстан, Әзірбайжан және Түрікменстан теңіз порттары өкілдерінің кездесуі өтті. Бұл туралы trend.az ақпарат агенттігі хабарлады.
Кездесуге Баку халықаралық теңіз сауда портының, Түркменбашы халықаралық теңіз портының, Ақтау халықаралық теңіз сауда портының және “Құрық” портының өкілдері қатысты.
Сонымен қатар, бейнеконференцияға Түркіменстанның Әзірбайжандағы төтенше және өкілетті елшісі Мекан Ишанғұлыев қосылды.
Кездесу барысында қатысушылар аталған мемлекеттердің теңіз порттары арасындағы ынтымақтастықты одан әрі дамыту перспективаларына назар аударды.
Түрікменстан дипломаты өз кезегінде коронавирустық инфекция көптеген елдерге әсер еткенін және онымен жалғыз күресу қиын екенін атап өтті. Осы тұрғыда Каспий өңірі мемлекеттерінің өзара қолдауы мен бірлескен күш-жігерінің маңыздылығын атап өтті.
Бейнеконференция аясында Қазақстан, Әзірбайжан және Түрікменстан теңіз порттарының өкілдері порттар арасында ақпарат алмасу бойынша жұмысты күшейтуге қатысты мәселелерді талқылады.
Атап айтқанда, тараптар жүктердің жекелеген түрлеріне немесе коронавирустық инфекциядан зардап шеккен елдердің жүргізушілеріне шектеулер енгізілуі туралы бір-бірін хабардар ету үшін порттардың өзара әрекеттесуін талқылады.
