Қазақстан жерін сатуға тыйым салуды көздейтін заң жобасы Мәжілісте жұмысқа қабылданды, деп zakon.kz хабарлайды.
“Қазақстан Республикасының кейбір заңнамалық актілеріне жер қатынастары мәселелері бойынша өзгерістер мен толықтырулар енгізу туралы” заң жобасы ҚР Президенті Тоқаевтың заңнамалық бастамасы тәртібімен енгізілді. Заң жобасын қабылдаудың мақсаты шетелдіктердің, азаматтығы жоқ адамдардың, шетелдік заңды тұлғалардың, шетелдік қатысуы бар ҚР заңды тұлғаларының, халықаралық ұйымдардың, сондай — ақ халықаралық қатысуы бар ғылыми орталықтардың ауыл шаруашылығы мақсатындағы жер учаскелерін жеке меншік құқығымен және уақытша жер пайдалану құқығымен иеленуіне тыйым салуды енгізу болып табылады, – деді жалпы отырыста жер қатынастары мәселелері жөніндегі заң жобасын таныстырған депутат Ерлан Барлыбаев.
Ол аграрлық мәселелер жөніндегі Комитет аталған заң жобасын жұмысқа алуға және ол бойынша қорытынды әзірлеуге дайын екенін айтты.
Ақпан айында Президент Қасым-Жомарт Тоқаев шетелдіктерге Қазақстанда ауыл шаруашылығы мақсатындағы жерлерді сатып алуға немесе жалға алуға тыйым салуды тапсырды. Мемлекет басшысы мұны Президенттің заңнамалық бастамасына айналдыру керектігін айтты.
Жер мәселесі әрқашан біздің халқымыз үшін өте маңызды болды. Бұл-біздің мемлекеттілігіміздің берік іргетасы және қасиетті рәмізі. Мен қазақстандық Жерді шетелдіктерге сату мүмкін еместігін бірнеше рет айттым. Бұл проблема туралы қауесетті тоқтату керек, – деді Мемлекет басшысы ұлттық қоғамдық сенім кеңесінің отырысында.
