Қазақстанның сауда және интеграция министрлігі басшысының орынбасары Қайрат Төребаев Қазақстан-Өзбек шекарасында “Орталық Азия” халықаралық экономикалық ынтымақтастық сауда орталығы пайда болатынын айтты.
Қазақстанның сауда және интеграция вице-министрінің айтуынша, бүгінгі таңда Өзбекстан еліміздің Орталық Азиядағы басты стратегиялық серіктесі болып табылады.
Сондай-ақ, ол “Орталық Азия” халықаралық экономикалық ынтымақтастық сауда орталығы Өзбекстанмен әріптестік аясында құрылатынын атап өтті.
“Келіссөздер жүргізіліп жатыр, бірнеше кезеңін өткіздік және осы халықаралық орталыққа 5 орнын таңдап алдық. Халықаралық Орталық Қазақстан мен Өзбекстан арасындағы шекарада ұсақ көтерме және бөлшек сауданың жаңа форматын енгізуге, халықаралық туризмді дамытуға, логистикалық қызметтерді жақсартуға және шекаралық бизнес кооперациясын жолға қоюға бағытталған”, – деді Қайрат Төребаев.
Сонымен қатар, Төребаев бұл жобаны іске асыру кезінде 10 мыңға жуық жұмыс орнын, ал пайдалану кезеңінде 40 мың жұмыс орнын ашу жоспарланып отырғанын айтты.
Сурет: Bnews.kz
