Қазақстан Сенатының депутаттары пленарлық отырыста еліміздің Үкіметі мен Еуропа ядролық зерттеулер ұйымымен ғылыми-техникалық халықаралық ынтымақтастық туралы келісімді (CERN) ратификациялау туралы заң жобасын қабылдады. Бұл туралы ҚР энергетика министрлігінің баспасөз қызметі хабарлады.
Ведомствоның ақпараты бойынша келісімге Женевада 2018 жылғы 29 маусымда қол қойылды. Бұл келісімді ратификациялау Қазақстан мен CERN арасындағы ғылыми байланыстарды кеңейтуге мүмкіндік береді,сондай-ақ біздің студенттер мен ғалымдарға CERN ғылыми-зерттеу жобаларына ұзақ мерзімді негізде қатысуға мүмкіндік береді.
«Келісімді бекіткеннен кейін Қазақстан Non-member state мәртебесіне ие болады. Бұл мәртебе қазақстандық ғалымдар мен мамандарға қолданыстағы қондырғыларда тағылымдамадан өтуге және мүшелік жарнасыз CERN жоспарлы эксперименттер мен ғылыми зерттеулерге қатысуға мүмкіндік береді», – деп хабарлады ҚР энергетика министрлігі.
Келісім Қазақстан мен CERN арасында атом энергиясын бейбіт мақсатта пайдалануда екіжақты ынтымақтастықты көздейді.
Энергетика министрлігі Қазақстанның Білім және ғылым министрлігімен бірлесіп, институттардың, сондай-ақ ғылыми ұйымдардың CERN зертханаларымен ынтымақтастығына бағытталған Жол картасын әзірлеп, бекітті.
Сурет: Itc.ua
