Қазақстанның сауда және интеграция министрлігінің басшысы Бақыт Сұлтанов бейнеконференция режимінде өткен Тәуелсіз Мемлекеттер Достастығы Экономикалық форумының отырысына қатысты. Бұл туралы Kazakhstan Today хабарлады.
Форумда сөз сөйлеген министр өткен жылдың нәтижелері бойынша сыртқы сауданың жиынтық көлеміндегі ТМД-ға қатысушы елдердің тауар айналымының үлес салмағы 18,4 пайызды құрағанын, бұл 2010 жылға қарағанда 2,5 пайызға аз екенін айтты.
Ол атап өткендей, мемлекеттер жұмысты өңірлік интеграцияны нығайтуға, өндірістік кооперацияны жақсарту үшін қолайлы жағдайларды қамтамасыз етуге, сондай-ақ тауар ағындарының құрылымдарын әртараптандыруға шоғырландыруы керек.
Сауда министрлігінің басшысы сондай-ақ ТМД елдеріне әріптес елдердің азық-түлік қауіпсіздігін қамтамасыз ету бөлігінде өз күш-жігерін біріктіруді ұсынды.
“Біз мемлекетаралық тауар өткізу жүйесін құру туралы бастама көтерудеміз”, – деді Сұлтанов.
Министр сондай-ақ ұлттық тауар өткізу жүйелерін Қазақстан, Ресей Федерациясы, Өзбекстан және Қырғызстан құра бастағанын айтты. Бірыңғай ақпараттық жүйе елдерінің ірі көтерме-тарату және агрологиялық орталықтарын біріктіру мемлекеттерге ағымдағы және болжамды көлемдер, тауарлардың түрлері және т. б. бойынша тез ақпарат алмасуға мүмкіндік береді.
Бұдан басқа, Сұлтановтың айтуынша, бірыңғай тауар өткізетін мемлекетаралық жүйе ауыл шаруашылығы тауарларын өндірушілерді, экспорттаушыларды, импорттаушыларды, сатып алушылар мен мүше елдердің логистикалық компанияларын бір халықаралық пулға біріктіруге ықпал етеді. Бұл өз кезегінде үшінші елдерге өнім жеткізуді жеңілдетеді.
Сурет: neonomad.kz
