Қазақстан Үкіметі Ауыл шаруашылығы саласындағы ынтымақтастыққа қатысты америкалық компаниялармен келісімге қол қойды, деп primeminister.kz хабарлайды.
Келісім-шарт біздің елімізде ирригациялық қондырғылар шығаратын зауыт салуды көздейді.
«Жаңбырлатқыш машиналарды қолдану арқылы аталған технология ауыл шаруашылығы дақылдарын өсіру үшін суды пайдалану көлемін қысқарту кезінде дақылдардың өнімділігін бірнеше есеге арттыруға мүмкіндік береді», — делінген хабарламада.
Ауыл шаруашылығы министрлігінің басшысы Сапархан Омаровтың айтуынша, Қазақстанда 1,4 миллион гектар суармалы жер бар, ал 2021 жылға дейін тағы 600 мың гектар жаңа жерді өңдеу жоспарлануда.
«Жалпы, 2022 жылға дейін 3 миллион гектарға жуық суармалы жерді айналымға енгіземіз. Ол үшін жаңбырлы суғару керек және аппаратураны Қазақстанда өндіру қажет», — деді ол.
Сондай-ақ, ирригациялық қондырғылар ұсынылатын алғашқы демонстрациялық алаңдар Ақмола және Түркістан облыстарында ашылатыны белгілі.
Сурет: bnews.kz
