Желіде көрермендер арасындағы танымалдығы мен онлайн-трансляциялар бойынша Тәуелсіз Мемлекеттер Достастығы елдерінің үздік опера театрларының рейтингісі пайда болды. Бұл туралы “Қазақпарат” ақпарат агенттігі хабарлады.
Рейтингті “ТурСтат” порталы жасады. Тізімде бірінші орында – Мәскеу қаласындағы Ресейдің Үлкен театры, екінші орында – Минскідегі Беларусьтың Үлкен театры, үшінші орында – Алматы қаласындағы Абай атындағы Қазақ мемлекеттік академиялық опера және балет театры, төртінші орында-Нұр-Сұлтан қаласындағы “Астана Опера” мемлекеттік опера және балет театры, ал бесінші орында – Бакудегі Ахундов атындағы Әзірбайжан мемлекеттік академиялық опера және балет театры.
Достастық мемлекеттерінің үздік театрларының тізімінде алтыншы орынды Еревандағы Спендиаров атындағы Армян академиялық опера және балет театры, ал жетінші орынды Ташкенттегі Әлішер Навои атындағы Өзбекстанның Үлкен театры иеленді.
Сегізінші орында Кишиневтегі Мария Биешу атындағы Молдова Ұлттық опера және балет театры, тоғызыншы орында Бішкектегі Абдылас Малдыбаев атындағы Қырғыз академиялық опера және балет театры.
Душанбедегі Садриддин Айни атындағы Тәжік мемлекеттік академиялық опера және балет театры ТМД елдерінің ең үздік театрлары рейтингісінде оныншы орында.
