Ақмола облысында полицейлер интернет-ресурстарды пайдаланып, пирамида схемасын ұйымдастырған алаяқты анықтады, деп хабарлайды zakon.kz.
Көкшетауда 65 жастағы әйел полицияға жүгінді. Оның айтуынша, бейтаныс әйел алаяқтық жолмен интернет-ресурстардың көмегімен 63 мың теңге ақшасын иемденген.
Бұл факт бойынша тәртіп сақшылары Қазақстан Республикасы Қылмыстық кодексінің 190 бабының 2-бөлімі «Алаяқтық» бойынша сотқа дейінгі іс бастады.
Жедел іздеу шаралары барысында 48 жастағы Көкшетау қаласының тұрғыны 2020 жылы пирамида схемасын ұйымдастыру үшін WhatsApp тобын құрғаны анықталды. Ақтау, Жаңаөзен, Нұр-Сұлтан, Павлодар және тағы басқа қалалардан 20-ға жуық адам оның құрбаны болды. Адамдарға келтірілген залалдың жалпы сомасы 70 миллионнан астам теңгені құрады. Әйел кінәсін мойындады, дейді полиция.
12 ақпанда Алматыда қаржы пирамидаларына қатысты тағы бір атышулы іс тергеліп жатқаны белгілі болды. 15 мыңға жуық қазақстандық қаржы пирамидасының құрбаны болған.
