Қазақстандық сыртқы саясат ведомствосының басшысы Мұхтар Тілеуберді бүгін Тәуелсіз Мемлекеттер Достастығы елдерінің Сыртқы істер министрлері кеңесінің отырысына қатысты, деп хабарлайды Қазақстан СІМ баспасөз қызметі.
Отырыс бейнеконференция байланысы арқылы өтті. Бейнеконференция барысында ТМД елдерінің сыртқы саяси ведомстволарының басшылары күн тәртібіндегі халықаралық және аймақтық мәселелерді талқылады.
Сыртқы істер министрлері коронавирустық инфекцияның таралуына және оның салдарын жоюға қатысты мәселелерге ерекше назар аударды.
Сондай-ақ отырыс шеңберінде Достастық мемлекеттерінің Сыртқы істер министрлері кеңесінің мүшелері елдер арасында гуманитарлық ынтымақтастық пен қауіпсіздік саласындағы өзара іс-әрекеттерді одан әрі дамытуға мүмкіндік беретін бірқатар маңызды шешімдерді қарастырды.
Бейнеконференция соңында министрлер Достастық шеңберінде биылғы жылға арналған сыртқы істер арасында көп деңгейлі консультациялар жоспарын қабылдады.
Сонымен қатар, ТМД елдері СІМ басшылары мемлекеттер арасындағы қорғаныс және қауіпсіздік, сондай-ақ білім, мәдениет және спорт саласындағы өзара іс-әрекеттерге байланысты бірқатар халықаралық құжаттардың жобаларын мақұлдады.
Сурет: gov.kz
