Сенат “Қазақстан Республикасының кейбір заңнамалық актілеріне туристік қызмет мәселелері бойынша өзгерістер мен толықтырулар енгізу туралы” заң жобасын екі оқылымда қабылдады, ол бойынша мемлекет басым туристік аумақтарда объектілер салатын бизнесмендерге инвестициялық преференциялар беруге тиіс, деп Tengrinews.kz хабарлайды.
“Басым туристік аумақ ұғымын енгізу жоспарлануда. Басым туристік аумақ-республикалық туристификациялау картасы объектілерінің тізбесіне енгізілген туристік дамудың ерекше әлеуеті бар аумақ. Басым туристік аумақ ресурстарды туризмді дамытудың неғұрлым перспективалы нүктелеріне шоғырландыру мақсатында құрылады. Сондай — ақ, бұл аумақта инвесторлар үшін ерекше артықшылықтар болады және қазақстандықтардың ел ішіндегі демалысын ынталандырады (басым инвестициялық жобалар бойынша шекті мәнді төмендету, инвестордың шығындарын өтеу кезінде жоба құнының неғұрлым жоғары шегі)”, – деді Сенат отырысында Мәдениет және спорт министрі Ақтоты Райымқұлова.
Сонымен қатар, шетелдіктер үшін туристік жарна енгізу ұсынылады.
“Әлемдік тәжірибені ескере отырып және ішкі және сыртқы нарықтарда өңірлік туристік әлеуетті ілгерілетуге жергілікті бюджеттің қосымша көздерін іздестіру мақсатында шетелдік туристен туристік алымды енгізу және осы алым бойынша операторларды айқындау көзделеді. Туристік алым мөлшерлемесін мәслихат бекітеді, ал төлеу тәртібін Үкімет бекітеді”, — деді министр.
Бұдан басқа, туризм саласындағы реттеу саясатын жетілдіру және оны Кәсіпкерлік Кодекске сәйкес келтіру жоспарлануда. Министрдің айтуынша, бұл туроператорлық қызметке лицензияны кіші түрлерге бөлу (шығу туризмі саласында, келу және ішкі туризм саласында), сондай-ақ бармай профилактикалық бақылауды регламенттеу сияқты нормалар.
Райымқұлованың айтуынша, заң жобасында туристік секторды мемлекеттік қолдаудың жаңа шараларын енгізуге байланысты уәкілетті және өзге де мемлекеттік органдарға қосымша құзыреттер беру көзделген, мысалы туристік қызмет объектілері мен жол бойындағы сервис объектілерін салу кезінде кәсіпкерлік субъектілері шығындарының бір бөлігін өтеу, туристік мақсаттарда автокөлік құралдарын және тау шаңғысы курорттарын дамытуға арналған жабдықтарды сатып алу кезінде шығындардың бір бөлігін өтеу, сондай-ақ турпакет құрамында әрбір әкелінген шетелдік турист үшін туроператорларды субсидиялау. Кәсіпкерлік субъектілерінің санитарлық-гигиеналық тораптарды ұстауға арналған шығындарының бір бөлігін субсидиялау, турпакет құрамындағы балаларға ұшақ билеті үшін тасымалдау ақысын өтеу.
“Біздің есептеулеріміз бойынша, осы шараларды енгізу экономикаға бюджеттің қосымша кірістері түрінде 135 миллиард теңге тартуға, 170 мыңнан астам жұмыс орындарын құруға және кемінде 1000 жобаны іске асыруға мүмкіндік береді. Барлық көрсетілген нормалар саланың дамуына оң әсерін тигізеді және инвестицияларды жандандырудың қолданыстағы тетігі болады, сондай — ақ саланың ЖІӨ-дегі үлесін 8 пайызға дейін жеткізу бойынша негізгі міндетке қол жеткізеді”, – деп түйіндеді министр.
