“Батыс” өңірлік қолбасшылығы қолбасшысының жауынгерлік дайындық жөніндегі орынбасары полковник Жеңіс Маралов індет жағдайында сарбаздарға әскери пәндерді қалай оқытатынын айтты. Бұл туралы Ақтөбе гарнизонының баспасөз қызметі жазады.
Ол жылына екі рет мерзімді және келісім-шарт негізіндегі әскери қызметкерлер жеке жауынгерлік даярлық бағдарламасынан өтетінін хабарлады. Оны игеруге жүз оқу сағаты бөлінеді.
Полковник осы кезеңде бөлімнің жауынгерлік дайындығының негізі қаланатынын атап өтті. Оның айтуынша, егер жауынгерлер бағдарламаны жақсы меңгерсе, кейін әскери бөлімше құрамында оқу-жаттығуларда қиындықтар туындамайды.
Жедел қызмет сарбаздары оқитын “Есет Батыр” полигонында коронавирустың таралуына байланысты барлық оқу іс-шаралары қатаң карантин нормаларын, соның ішінде бетперде режимін және әлеуметтік қашықтықты сақтай отырып өткізіледі.
Мерзімді әскери қызметкерлердің офицерлермен байланысын барынша азайту мақсатында мерзімді әскери қызмет сарбаздарымен сабақ өткізетін лауазымды адамдар тағайындалды.
Қазақстанда коронавирусты жұқтырудың 16351 жағдайы ресми түрде тіркелді, бұл ретте олардың ең көп саны Алматыда анықталды, атап айтқанда 3258 жағдай.
Сурет: azh.kz
