Қазақстан Республикасы СІМ басшысы Бейбіт Атамқұловтың Тәуелсіз Мемлекеттер Достастығы қатысушы елдер мен Грузия дипломатиялық өкілдіктерінің басшыларымен жұмыс кездесуі өтті, деп хабарлайды “ҚазАқпарат” Халықаралық ақпарат агенттігі, министрліктің баспасөз қызметіне сілтеме жасап.
Кездесуге Беларусь Республикасының Елшісі Анатолий Ничкасов, Ресей Федерациясының елшісі Алексей Бородавкин, Украина елшісі Иван Кулеба, Өзбекстан Республикасының елшісі Саидикрам Ниязходжаев, Қырғызстан Республикасының елшісі Жеенбек Құлубаев, Тәжікстан Республикасының елшісі Хайрулла Ибадзада, Түрікменстан Республикасының елшісі Тойлы Көмеков, Әзірбайжан республикасының елшісі Рашад Мамадов, Армения елшісі Гагик Галачян, Грузия елшісі Зураб Абашидзе қатысты.
Министр, елшілері кездесуге қатысқан мемлекеттермен жан-жақты қатынастарды дамыту ҚР сыртқы саясатының басты басымдықтарының қатарына жататынын атап өтті.
Атамқұлов сауда-экономикалық ынтымақтастық спектрін кеңейту және тауарлар өндірісі мен ауыл шаруашылығы өнімдерін жеткізу салаларындағы бірлескен қызметті кеңейту үшін елдердің аумақтық жақындығы мен өңірдің көліктік-логистикалық әлеуетін барынша пайдалану қажет екенін айтты.
Министр саяси, сауда-экономикалық және мәдени-гуманитарлық ынтымақтастықты нығайту үшін бірлескен қызметтің жоғары қарқынын қолдау қажеттігін айтты.
Кездесуге қатысушылар соңғы жылдағы қызметтің қорытындыларын шығарды, сыртқы экономикалық және инвестициялық байланыстарды нығайту назар аудара отырып, алдағы жоспарларды белгіледі, көпжақты ынтымақтастықты тереңдетудің басымдықтарын анықтады.
Атамқұлов Орталық Азиядағы мемлекетаралық қатынастардың нығаюы мен жандануына оң баға беріп, Тәуелсіз Мемлекеттер Достастығы мен Еуразиялық экономикалық одақтың рөлінің маңыздылығын атап өтті.
Сурет: inform.kz
