Дзюдодан Қазақстан құрамасы Қытайда IJF World Judo Tour турнирлерінің элиталық сериясы кезеңдерінің бірі — Хух-Хото-2019 Гран-приіне бара алмайды. Бұл туралы Қазақстан дзюдо федерациясының ресми сайты хабарлайды.
Қазақстанның ерлер құрама командасы турнирге толық құрамда қатысуға өтініш білдірді, алайда бұл кезеңге қытай тарапының виза беруден бас тартуына байланысты бара алмайтын болды. Бас тарту себептері нақтыланған жоқ. Турнир 24-26 мамыр аралығында өтеді. Жарысқа әлемнің 42 елінен 300-ге жуық спортшы қатысады.
Бір қызығы, ҚХР сауда министрінің орынбасары Цзян Яопин Қазақстан билігіне ҚХР азаматтарына виза беру рәсімін жеңілдету туралы өтініш жасап, «Қазақстанмен бірлескен жобаларды мерзімінде және табысты жүзеге асыруға» үлес қосатынын айтқан болатын.
