Біздің республикамыздың басшысы Қасым-Жомарт Тоқаев коронавирус инфекциясымен күрес мәселесі талқыланған Түркі кеңесінің отырысына қатысты. Бұл туралы Ақорданың баспасөз қызметі хабарлады.
Бейнеконференция байланысы режимінде өткен отырысқа Әзірбайжан президенті Ильхам Әлиев, Қырғызстан президенті Сооронбай Жээнбеков, Түркия президенті Реджеп Эрдоған және Өзбекстан президенті Шавкат Мирзиеев және шақырылған қонақ ретінде Түрікменстан басшысы Гурбангулы Бердымухамедов қатысты.
Сонымен қатар, бейнеконференцияға Венгрияның премьер-министрі Виктор Орбан және Дүниежүзілік денсаулық сақтау ұйымының Бас директоры Тедрос Адхан Гебрейесус қосылды.
Отырыстың күн тәртібіне денсаулық сақтау саласындағы ынтымақтастыққа, Түркі Кеңесі елдерінің азаматтарына көмек көрсетуге және оған мүше мемлекеттер арасындағы сауда байланыстарын қамтамасыз етуге қатысты мәселелер қойылды.
Өз сөзінде Қазақстан басшысы Түркі Кеңесі бойынша әріптестеріне коронавирустың салдарын еңсеру үшін бірлескен іс-қимыл жоспарын құруды ұсынды.
Қасым-Жомарт Тоқаевтың айтуынша, бұл құжатқа Түркі Кеңесіне қатысушы елдер арасындағы өзара сауда мен инвестицияларды ынталандыруға бағытталған шаралар енгізілуі тиіс.
“Егер біз Түркі сауда-өнеркәсіп палатасы мен Түркі инвестициялық қорының жұмысын жандандырсақ, бұл тұрғыда барлығына пайдалы болады”, – деді Тоқаев.
Қазақстан Республикасының Президенті індеттің салдары жойылғаннан кейін Түркі Кеңесі аясында ынтымақтастықты дамыту мүмкіндіктерін қарастыру қажет екенін атап өтті.
Сурет: inform.kz
